നീണ്ട പതിനാല് വര്‍ഷത്തെ കാത്തിരിപ്പിനൊടുവിലാണ് കുഞ്ചോക്കോ ബോബനും പ്രിയയ്ക്കും കുഞ്ഞ് പിറക്കുന്നത്. ആണ്‍കുഞ്ഞ് പിറന്ന വിവരം ചാക്കോച്ചന്‍ തന്നെയാണ് സോഷ്യല്‍ മീഡിയകളിലൂടെ ആരാധകരെ അറിയിച്ചത്. കുഞ്ഞിന്റെ പേരെന്താകുമെന്നായിരുന്നു പിന്നത്തെ ചര്‍ച്ച. കുഞ്ഞിന്റെ പേരെന്തെന്ന് ഇപ്പോള്‍ കുഞ്ചാക്കോ ബോബന്‍ തന്നെ വെളിപ്പെടുത്തിയിരിക്കുകയാണ്.
ബോബന്‍ കുഞ്ചാക്കോ എന്നാണ് കുഞ്ഞിന് പേരിട്ടിരിക്കുന്നത്. ഒരു സ്വകാര്യ ചാനലിന്റെ അവാര്‍ഡ് നിശയില്‍ യേശുദാസിനോടാണ് ചാക്കോച്ചന്‍ കുഞ്ഞിന്റെ പേര് വെളിപ്പെടുത്തിയത്. അവാര്‍ഡ് നിശയില്‍ അവതാരകനായായിരുന്നു കുഞ്ചാക്കോ ബോബന്‍. പുരസ്‌കാരം സ്വീകരിക്കാനായി വേദിയിലെത്തിയപ്പോള്‍ യേശുദാസ് അച്ഛനായതില്‍ കുഞ്ചാക്കോ ബോബനെ അഭിനന്ദിക്കുകയും കുഞ്ഞിന്റെ പേര് ചോദിക്കുകയുമായിരുന്നു.
തന്റെ പേര് തിരിച്ചിട്ടാല്‍ മതിയെന്നായിരുന്നു ഇതിന് കുഞ്ചാക്കോ ബോബന്റെ മറുപടി. കുഞ്ചാക്കോ ബോബന്റെ അച്ഛന്റെ പേരും ബോബന്‍ കുഞ്ചാക്കോ എന്നായിരുന്നു. ആ പേര് തിരിച്ചിട്ടാണ് അദ്ദേഹം തന്റെ മകന് കുഞ്ചാക്കോ ബോബന്‍ എന്ന് പേരിട്ടത്. ഇതേ മാര്‍ഗം തന്നെയാണ് തന്റെ മകന് പേരിടാന്‍ ചാക്കോച്ചനും തെരഞ്ഞെടുത്തത്.
